मदन विक/बाजुरा २७ असार। जव वर्षातको समय सूरु हुन्छ तब बाजुरामा सडक अवरुद्ध हुन थाल्दछ । वर्षातकै कारण बाजुरा सदरमुकाम मार्तडीसम्मको मुख्य राजमार्ग साँफे-मार्तडी सडक खण्डमा वार्हैमास यातायात चल्न पाउँदैनन् । यही चिन्ताले यहाँका स्थानीयहरु वर्षातको समयमा खासै यात्रा गर्न चाहाँदैनन् ।

सिलानास गरेको २२ वर्षपछि जिल्लाको सदरमुकाम मार्तडीसम्म पक्की बनेको सडक ३ वर्ष नपुग्दै सडक माथिबाट खसेको पहिरोले तहस नहस भई विग्रेको अवस्थामा छ ।

अविरल वर्षासँगै आएको पहिरोले सडक माथिबाट पहिरो र तलबाट बुढीगंगा नदिले कटान गरेपछि दवारी नजिकैको करिव ५ सय मिटर सडक पूणर् रुपमा विग्रेपछि सदरमुकाम मार्तडी सम्मको यातायात सेवा अवरुद्ध बनेको छ ।

विज्ञापन

पहिरोका कारण सडक भत्किएपछि अहिले सो क्षेत्र हुँदै आवत जावत गर्ने स्थानीय यात्रुहरु अलपत्र अवस्थामा छन् । सदरमुकाम मार्तडीमा आउन र जानलाई एकजना यात्रीले कम्तिमा ३ वटा गाडीहरु फेरेर जोखिमपूणर् यात्रा गर्नु पर्ने बाध्यता भएको छ । निरन्तरको वर्षातका कारण भत्किएको सडकलाई पुन मर्मत गर्नका लागि कतैबाट पहल नभएपछि स्थानीयहरु यतिबेला आक्रोसित बनेका छन् ।

यता प्रमुख जिल्ला अधिकारी कृष्ण गैरेले सो क्षेत्रमा सडकको दिगो व्यवस्थापन गर्न सडक डिभिजन कार्यालयलाई निरन्तर आग्रह गरिरहेको बताउँदै आएका छन् ।

जिल्लामा निरन्तर वर्षा भईरहेकोले सो क्षेत्रको सडकलाई तत्काल खुलाउन समस्या भएको सडक डिभिजन कार्यालय साँफेबगरले बताएको छ । उसो त यस अघि यस क्षेत्रको सडकलाई दिगो व्यवस्थापन गर्नका लागि जिल्ला प्रशासन कार्यालय बाजुरामा सरोकारवालाहरुको पटक पटक बैठक बस्दै आएको छ । तर पनि सो ठाउँमा सडकको दिगो व्यवस्थापन भने हुन सकेको छैन् ।