धनगढी : आगामी असोज १ गतेदेखि यातायात व्यवसायीहरुले सबै सार्वजनिक सवारी साधन सञ्चालन गर्ने घोषणा गरेका छन्। सरकारले कोरोना नियन्त्रणका नाममा सार्वजनिक यातायात संचालनलाई निषेध गरेका बेला सुदूरपश्चिमका यातायात व्यवसायीले भने असोज १ गतेदेखि पूर्ण रुपमा यातायात सञ्चालनको तयारी गरेका हुन्।

सुन्दर सुदूरपश्चिम यातायात प्रालीका अध्यक्ष पदम सापकोटाले १ गतेदेखि सार्वजनिक यातायात पूर्ण रुपमा सञ्चालन गर्ने तयारी भईरहेको बताए। उनले लामो तथा छोटो दूरीका यातायात चलाउने केन्द्रमा समेत तयारी भईरहेको बताउँदै सुदूरपश्चिममा पनि सोही अनुसार यातायात सञ्चालन हुने बताए। कोरोना प्रभावपछि जारी लकडाउन र निषेधाज्ञाका कारण सूरपश्चिमका यातायात व्यवसायी मारमा परेका छन्।

गत चैत ११ गतेदेखि जारी एक सय २० दिन लामो लकडाउन र अहिले स्थानीय प्रशासनले घोषणा गरेको निषेधाज्ञाका कारण यातायात व्यवसायी मारमा परेका हुन्। कर्णाली रिभर साईड यातायात प्रालीका अध्यक्ष धिरज शाहीले ६ महिनादेखि सार्वजनिक यातायात ठप्प भएपछि सयौँ व्यवसायीसंगै हजारौं मजदुर पनि समस्यामा परेको बताए।

‘कतिपय यातायात व्यवसायीहरुले आफ्नै लगानीमा सवरी संञ्चालन गरेको भएपनि धेरै जसोले भने बैंकबाट ऋण निकालेर र किस्तामा बसहरु खरिद गरेका छन्,’ उनले भने, ‘सार्वजनिक सवारी साधन नियमित रुपमा संञ्चालन भएपछि मात्रै बैंकको ब्याज र गाडीको किस्ता तीर्न सहज हुनेछ।’

कैलालीमा भने जिल्ला भित्र मात्रै जोरविजोर प्रणाली लागु गरेर सार्वजनिक सवारी साधान संञ्चालन गर्न अनुमती दिईएको छ। ५० प्रतिशत मात्रै यात्रु बोक्न पाउने गरि सार्वजनिक सवारी संञ्चालन गर्न पाईने भनिएको हो। तर जोरविजोर प्रणाली लागु भएपछि कम सवारी साधान चल्ने भएका कारण भिडभाड भने बढी हुने गरेको छ।