काठमाडौं – सरकारले काठमाडौं उपत्यकाभित्र ट्याक्सी तथा सार्वजनिक सवारीसाधन सञ्चालन गर्न दिने निर्णय गरेको छ । काठमाडौंबाहिर पनि एक जिल्लाबाट अर्कोमा जान नपाउने गरी सार्वजनिक सवारीसाधन चल्न पाउनेछन् ।
बिहीवार (आज) मन्त्रिपरिषदका निर्णय सार्वजनिक गर्न आयोजित पत्रकार सम्मेलनमा सरकारका प्रवक्ता सूचना तथा सञ्चार प्रविधिमन्त्री डा. युवराज खतिवडाले काठमाडौं उपत्यकामा सार्वजनिक सवारी सञ्चालन गर्न दिने निर्णय भएको जानकारी दिए ।
उनका अनुसार उपत्यकाभित्र ट्याक्सीमा चालकसहित ३ जना यात्रा गर्न पाइने छ । एकै परिवारका सदस्य भए एउटा ट्याक्सीमा ५ जनासम्म यात्रा गर्न पाइनेछ ।
विज्ञापन
यस्तै सरकारले सुरक्षाको मापदण्ड अपनाएर सार्वजनिक साधन सञ्चालन गर्न दिने निर्णय गरेको छ । उपत्यकाबाहिर पनि एक जिल्लाबाट अर्को जिल्लामा जान नपाउने गरी सवारी सञ्चालन गर्न दिने निर्णय गरिएको छ ।
सार्वजनिक सवारीमा भौतिक दूरी कायम राखेर सिट क्षमताको ५० प्रतिशत यात्रु राखेर सञ्चालन गर्न पाइने छ । सवारीमा सेनिटाइजर अनिवार्य गरिएको छ भने चालक र सहचालकले मास्क र ग्लोब लगाउनु पर्नेछ । सरकारले थोरै यात्रु भएका कारण सार्वजनिक सवारीले ५० प्रतिशतसम्म बढी भाडा उठाउन पाउने निर्णय समेत गरेको छ ।
लकडाउन खुकुलो भएसँगै काठमाडौं उपत्यकामा निजी सवारी साधन सञ्चालनमा आएका थिए । व्यवसायीले बैंकको किस्ता तिर्न समेत गाह्रो भएको भन्दै उचित सुरक्षा अपनाएर सवारी साधन चलाउन पाउनुपर्ने माग राख्दै आएका थिए ।सरकारले लामो र मध्यम दूरीका सवारी साधन चलाउनमा भने अझै रोक लगाएको छ ।
फेसबुक प्रतिक्रियाहरु