काठमाडौं– नेपाल सेनाले निर्माण जिम्मा लिएको काठमाडौं–तराईं/मधेस द्रुत मार्ग (फास्ट ट्र्याक)मा हालसम्म १२ अर्ब ६४ करोड खर्च भएको छ ।
महालेखा परीक्षकको कार्यालयको ५६ औं प्रतिवेदनमा फास्ट ट्र्याक निर्माणका लागि हालसम्म १२ अर्ब ६४ करोड ६२ लाख खर्च भएको उल्लेख छ ।
विज्ञापन
सेनाले निर्माण जिम्मा पाएको फास्ट ट्रयाकमा अहिलेसम्म रुख कटान, माटो काट्ने तथा पुर्ने काम, जग्गा खरिद, क्याम्प निर्माण, सवारी साधन तथा निर्माण सामग्री खरिद र निर्माण उपकरण भाडामा लिन उक्त खर्च भएको महालेखाले प्रतिवेदनमा उल्लेख गरेको छ ।
महालेखाका परीक्षकको प्रतिवेदनअनुसार फास्ट ट्र्याक निर्माण गर्न १६ हजार ५ सय १४ ओटा रुख कटानी गर्न ३ करोड ९१ लाख रुपैयाँ खर्च भएको छ । यस्तै ६० लाख १७ हजार घनमिटरमा माटो काट्ने र ८ लाख ९ हजार घनमिटरमा माटो पुर्ने काममा ३ अर्ब ५८ करोड ७९ लाख रुपैयाँ खर्च भएको छ ।
फास्ट ट्र्याक निर्माणका लागि ८ हजार ९ सय ७२ रोपनी जग्गा खरिद गर्दा ३ अर्ब १० करोड ३५ लाख रुपैयाँ खर्च भएको महालेखा परीक्षकको कार्यालयको प्रतिवेदनमा उल्लेख छ । प्रतिवेदनअनुसार ११ वटा निर्माण क्याम्प बनाउनका लागि ७७ करोड १ लाख रुपैयाँ खर्च भएको छ ।
फास्ट ट्र्याक निर्माणका लागि आवश्यक पर्ने २ सय ९३ ओटा सवारी साधन र निर्माण उपकरण खरिदका लागि ९९ करोड ५४ लाख रुपैयाँ खर्च भएको छ । यस्तै विभिन्न प्रकारका साना र ठूला निर्माण उपकरणहरु २ लाख ५७ हजार २ सय ५५ घण्टाका लागि भाडामा लिएर काम गर्दा ८६ करोड ९६ लाख रुपैयाँ खर्च भएको महालेखा परीक्षकको प्रतिवेदनमा औंल्याइएको छ ।
फास्ट ट्र्याक निर्माणका लागि बोलपत्र प्रक्रियाबाट १३ अर्ब २६ करोड रुपैयाँको ठेक्का सम्झौता भएकोमा ३ अर्ब ५८ करोड ७९ लाख रुपैयाँ खर्च भएको प्रतिवेदनमा औंल्याइएको छ ।
नेपाली सेनाले निर्माण जिम्मा पाएको फास्ट ट्र्याकबारे महालेखा परीक्षकको प्रतिवेदन,
फेसबुक प्रतिक्रियाहरु