नागरिक रैबार/बाजुरा १८ बैशाख।बाजुराको प्रदेश निर्वाचन क्षेत्र (ख) बाट निर्वाचित प्रदेश सांसद पदमबहादुर शाहीले बाजुरामा सडक, कृषि, स्वास्थ्य र शिक्षा क्षेत्रको विकासका लागि पहल गर्ने बताएका छन् ।

आईतबार बिहान प्रेस युनियन बाजुरा शाखाले मार्तडीमा आयोजना गरेको पत्रकार सम्मेलनमा सांसद शाहीले यस्तो बताएका हुन् ।
उनले बाजुरा जस्तो विकट क्षेत्रमा कृषि, सडक, स्वास्थ्य र शिक्षा पछाडि परेकोले आफ्नो पाँच वर्षे कार्यकालमा यिनै क्षेत्रहरुलाई प्रमुख विकासको एजेण्डा बनाएर सुदूरपश्चिम प्रदेशमा पहल गर्ने बताएका हुन् ।

सांसद शाहीले पहिलो वर्ष बाजुराको प्रदेश (ख) क्षेत्रमा रहेका ५ वटै पालिकाका ग्रामिण र पर्यटकीय क्षेत्रका सडकहरुको स्तरोन्नति गर्नका लागि प्रदेशबाट बजेटको माग गर्ने बताएका छन् ।

विज्ञापन

उनले बल्दे दवारीको बैकल्पिक सडकको स्तरोन्नति गर्न गरेर सदरमुकामसम्म नियमित यातायात संचालनका पहल गर्ने र यसै आर्थिक वर्षभित्र भौनेरामा बेलिवृज जडानका लागि सूरुवात गर्ने समेत उनले बताए ।

त्यसै गरी उनले बाजुराका सबै स्थानिय तहमा एक वटा खेलमैदानको अवधारणा सहित बजेटमा समेट्ने बताएका छन । प्रदेश सरकारबाट आयोजनाका रुपमा रहेका गौरवका योजनाहरुलाई निरन्तरता दिने र बाकी सडकहरुमा गौमुल बझाङ सडक, बाम्का देखी खप्तड, मार्तडी बडिमालिका सडक लगायतका सडकहरु बनाउन पहल गर्ने सांसद शाहीले बताएका छन् ।

प्रेस युनियन बाजुराका अध्यक्ष प्रेम रौलेको अध्यक्षतामा संचालन भएको पत्रकार सम्मेलनका प्रमुख अतिथि प्रदेश सभा सदस्य पदम बहादुर शाही रहेका थिए । प्रेस यूनियन बाजुराका सचिव प्रशान्त जोशीले संचालन गरेको कार्यक्रममा पत्रकार लगायत अन्यको समेत उपस्थिती रहेको थियो ।