धनगढी: स्थानीय तह निर्वाचन नजिकिएसँगै शिर्ष नेताहरु सुदूरपश्चिम केन्द्रित हुन थालेका छन्। नेपाली काँग्रेस र नेकपा एमालेका नेताहरुको सुदूरपश्चिम आउने कार्यक्रम तय भएको हो। निर्वाचन प्रचारप्रसारका लागि नेपाली काँग्रेसका सभापतिसमेत रहेका प्रधानमन्त्री शेरबहादुर देउवा कैलाली र गृहजिल्ला डडेल्धुरा पुग्ने कार्यक्रम छ। मंगलबार काँग्रेसका मुख्य सचिव कृष्णप्रसाद पौडेलले विज्ञप्तिमार्फत देउवा चुनावी सभालाई सम्बोधन गर्न धनगढी र डडेल्धुरा पुग्ने जानकारी दिएका छन्।
काँग्रेस र गठबन्धनका उम्मेदवार जिताउन देउवासहित पार्टीका शीर्ष नेताहरूले चुनावी सभालाई सम्बोधन गर्ने पौडेलले बताए। जसअनुसार देउवा वैशाख २६ गते कैलाली आउने छन्। उनीसँगै धनगढीमा वरिष्ठ नेता रामचन्द्र पौडेल र सहमहामन्त्री फरमुल्लाह मंसुरसहित चुनावी सभालाई सम्बोधन गर्ने छन्। त्यसैको भोलिपल्ट उनी गृहजिल्ला डडेल्धुरा जाने कार्यक्रम रहेको छ। त्यहाँ पनि देउवासहित नेता पौडेल र सहमहामन्त्री बद्री पाण्डे लगायतले चुनावी सभालाई सम्बोधन गर्ने कार्यक्रम रहेको छ।
यस्तै नेकपा एमालेका अध्यक्ष केपी शर्मा ओली बिहीबार धनगढी आउने कार्यक्रम तय भएको छ। उनी चुनावी सभालाई सम्बोधन गर्न धनगढी आउने भएका हुन्। अध्यक्ष ओलीले धनगढी उपमहानगरपालिकासहित कञ्चनपुरमा चुनावी सभालाई पनि सम्बोधन गर्ने कार्यक्रम रहेको बताइएको छ।
फेसबुक प्रतिक्रियाहरु