नेपाल सरकार सूचना तथा सञ्चार प्रविधि मन्त्रालयले प्रदान गर्दै आएको ‘राष्ट्रिय पत्रकारिता पुरस्कार’ सञ्चारिका समूहकी अध्यक्ष नितु पण्डित सहित ३ जना पत्रकार महिलालाई प्रदान गर्ने निर्णय गरिएको छ ।

छैटौं राष्ट्रिय पत्रकारिता दिवसको अवसरमा घोषणा गरिएको यस पुरस्कारबाट पण्डितसँगै प्रेस काउन्सिलकी पूर्व सदस्य संगिता खड्का र सञ्चारिका समूहकी सदस्य पूनम पौडेलले पाउने भएका छन् । कोरोनाको कारण अघिल्लो वर्षको पुरस्कार समेत यसै वर्ष घोषणा गरिएको हो । खड्का राष्ट्रिय पत्रकारिता पुरस्कार २०७६ बाट हो भने पण्डित र पौडेल २०७७ बाट पुरस्कृत हुन लागेका हुन् ।

पुरस्कार घोषणा कार्यक्रममा बोल्दै सूचना तथा सञ्चार प्रविधि मन्त्री पार्वत गुरुङ्गले श्रमजिवी पत्रकारको क्षमता अभिबृद्धिका लागि आमसञ्चार प्रशिक्षण प्रतिष्ठानको स्थापना, पत्रकार कल्याण कोषको परिचालन लगायत लोककल्याणकारी विज्ञापन र अनुदान सहायता मार्फत आमसञ्चार क्षेत्रको समस्या सम्वोधन गरिने बताए । उनले भने, ‘कोभिड १९ लाई प्राथमिकतामा राखेर सकारात्मक सन्देश संप्रेषण गर्न, सामाजिक सञ्जालको मर्यादित प्रयोग गर्न आव्हान गर्दछु ।’

विज्ञापन

पुरस्कार कार्यक्रम कोरोना कहरपछि उपयुक्त समयमा कार्यक्रम आयोजना गरी प्रदान गरिने छ । मन्त्रालयले वर्षेनी दुई जनालाई वरिष्ठ पत्रकार सम्मान प्रदान गर्दै आएको छ । यसको राशी जनही रु २ लाख छ । त्यसैगरी ६ जनालाई जनही रु १ लाखबाट राष्ट्रिय पत्रकारिता पुरस्कार प्रदान गर्दै आएको छ । कोरोनाको विषम् परिस्थितिमा पनि पत्रकारलाई प्रोत्साहन होस् भनि यो पुरस्कारको घोषणा गरिएको पुरस्कार छनोट समितिका सदस्य डाक्टर समिक्षा कोइरालाले बताइन् । उनले भनिन्, ‘यो बेला पत्रकारलाई प्रोत्साहन दिन आवश्यक छ, काम कार्यविधि र समावेशीताको आधारमा पुरस्कार छनोट गरेका हौं ।’ महिला खबरबाट साभार