नागरिक रैबार/बाजुरा १० पुस। जिल्ला प्रहरी कार्यालय बाजुराको प्रहरी हिरासत भित्र प्रहरीको कुटाईबाट शक्त घाईते भएका बडीमालिका नगरपालिका ९ का २२ वर्षिया गोपाल विकको बाजुरा जिल्ला अस्पतालमा उपचार भईरहेको छ ।

प्रहरी हिरासतमा २४ दिनदेखि रहेका विकलाई प्रहरीले हिरासत भित्र कुटपिट गरी शक्त घाईते बनाएको विककी आमा तुला चंदाराले बताएकि छन् । उनले भनिन् छोराले आफुले गरेको गल्ती स्वीकार गरेको भएपनि प्रहरीले शक्त घाईते बनाएपछि नाकबाट र मल्द्धवारबाट रगत आउने गरेको छ ।

विज्ञापन

हिरासत भित्र प्रहरीको कुटाईबाट घाईते भएका विकका अनुसार आफु चोरी मुद्धामा बसेको भएपनि प्रहरीले हिरासतमा विभिन्न खालका यातनासहित अपशव्द बोल्दै आफुमाथि मरणासन्न हुने गरी कुटपिट गरेको बताएका छन् । आफु हिरासत भित्र बसिरहेको बेला प्रत्येक दिन आएर प्रहरीले आफुमाथि यातना दिने कुटपिट गर्ने गरेको बताए ।

हिरासतमा रहेका विकलाई चोरी कसुरको मुद्धा लागेर गत मंसिर १६ गते प्रहरीले पक्राउ गरेको थियो । बाजुरा जिल्ला अदालतबाट विक विहिबार मात्र २४ दिनपछि २० हजार धरौटीमा छुटेका थिए । यता जिल्ला प्रहरी कार्यालय बाजुराका प्रहरी नायव उपरिक्षक मदन जित महराले भने विकलाई हिरासत भित्र कुनैपनि किसिमको यातना र कुटपिट नगरेको बताएका छन् ।