इंग्लिस प्रिमियर लिग च्याम्पियन टोली लिभरपुललाई घरेलु मैदानमै उपाधि ट्रफी प्रदान गरिने भएको छ ।लिगका सबै खेल सकिनु अघि नै च्याम्पियन भइसकेको लिभरपुलले जुलाई २२ मा घरेलु मैदान एनफिल्डमा उपाधि उचाल्ने भएको हो ।

लिगअन्तर्गत चेल्सीविरुद्धको खेलपछि लिभरपुलले उपाधि उचाल्ने भएको हो । सिजनको अन्तिम खेल न्युकासलसँग उसैको मैदानमा खेल्ने भएका कारण लिभरपुललाई एक खेल अगाबै ट्रफी दिन लागिएको हो ।

तर, लिभरपुलले ट्रफी उचाल्दा समर्थकहरू भने हुने छैनन् । कोरोना भाइरसको महामारीको कारण खेल बन्द रंगशालामा भइरहेको छ । उपाधि समारोह पनि बन्द रंगशालामा हुनेछ ।लिभरपुलले ३० वर्षपछि प्रिमियर लिगको उपाधि जितेको हो । यसअघि लिभरपुलले सन् १९८९ र ९० को सिजन प्रिमियर लिगको उपाधि जितेको थियो ।यस सिजन लिभरपुल दोस्रो स्थानको म्यानचेस्टर सिटी भन्दा १८ अंकले अघि रहेको छ ।

विज्ञापन