मदन वि.क./बाजुरा १४ असार। बाजुराका कृषकलाई यतिबेला रोपाईको चटारो चलेको छ । तर, असार मसान्तको मध्ये भागमा आईसक्दा पनि खेतियोग्य जमिनमा प्रयाप्त मात्रामा सिँचाई सुविधा नभएपछि कृषकहरुलाई खेतबारीमा धान रोप्न अझै समस्या उत्पन्न भएको छ ।
कृषकहरुले अघिल्ला वर्षहरुमा असार १५ गते भित्र जिल्लाका अधिकाँस खेतियोग्य जमिनमा धान रोपेर सक्ने गरेका थिए । तर यस वर्ष मौसमले साथ नदिएपछि यस वर्ष रोपाई ढिलो भएको कृषकहरुले बताएका छन् ।

जेठ र असार मसान्तलाई मानो रोपेर मुरी उव्जाउने महिनाका रुपमा लिएर जिल्लाको मार्तडी, जुगाडा, रजाली, आटिचौर, ब्रह्मतोला, बाह्रविस, तोली, कैलाशमाण्डौ, कोल्टी पाण्डुसेन लगायतका खेतियोग्य जमिनमा धान रोप्ने गरेका छन् ।

कृषकहरुले करिब ५० प्रतिशत स्थानीय जातको धान खेती गर्ने गरेका छन् भने ५० प्रतिशत उन्नत जातको धान खेती गर्ने गरेका छन् ।
गत वर्ष जेठको अन्तिम साताबाट रोपाई सुरु गर्ने गरेका थियौं यस वर्ष सिँचाई सुविधा नहुँदा असारको पहिलो साताबाट रोपाई सुरु गरिएको कृषक पारु ऐडीले बताईन् ।

विज्ञापन

यता कृषि ज्ञान केन्द्र बाजुराका अनुसार पछिल्लो समयमा जलवायु परिवर्तनका कारण सुख्खा खडेरी मलको अभाव, उन्नत जातको वीउवीजनको अपर्याप्ततका कारण कृषकहहरुले वर्षेनी सोचेजस्तो धान उत्पादन गर्न नसकेका हुन् ।

जिल्लामा सिँचाईको सुविधा प्रयाप्त मात्रामा नभएपछि जिल्लाको कुल धान खेति हुने ७ हजार २ सय ३० हेक्टरमध्ये २ हजार १ सय ७० हेक्टर अर्थात ३० प्रतिशत मात्र धान रोपाई सम्पन्न भएको कृषि ज्ञान केन्द्र बाजुराका कृषि प्रसार अधिकृत मिनप्रसाद जैशीले बताएका छन् । 
पछिल्लो समयमा कृषि ज्ञान केन्द्र र स्थानीय तहका कृषि शाखाहरुले जिल्लामा धानको उत्पादन तथा उत्पादकत्व वृद्धि गर्नका लागि कृषकहरुलाई उन्नत जातको वीउ वितरण तालिम तथा अन्य सामाग्री सहयोग गरिरहेको बताएका छन् ।