नागरिक रैबार/बाजुरा ४ फागुन। बाजुरामा बसको ठक्करबाट घाइते भएका एक बालकको उपचारको क्रममा मृत्यू भएको छ । साँफे-मार्तडी राजमार्गमा पर्ने बुढीगंगा नगरपालिका-१ अम्कोटमा आइतबार विहान बसको ठक्करबाट घाइते अन्दाजी ५ वर्षका नयन पाध्यायको उपचारका क्रममा जिल्ला अस्पताल बाजुरामा मृत्यु भएको हो ।

धनगढीबाट मार्तडी आउँदै गरेको सु प प्र ०१–००१ ख ३६८८ नम्बरको बसले बुढीग‌गा नगरपालिका २ स्थित बल्देबजार नजिकै रहेको पसलमा छोरा सहित घाम तापेर बसिरहेकी अन्दाजि ३५ वर्षिया आमा विश्ना पाध्यायलाई बसले ठक्कर दिएको थियो । बसको ठक्करले घाइते भएका आमा छोरा दुवैलाई जिल्ला अस्पताल बाजुरामा उपचारका लागि ल्याइएको थियो ।

गम्भिर घाइते भएका बालकको जिल्ला अस्पताल बाजुरामा उपचारका क्रममा मृत्यु भएको थियो । सोही घटनालाई लिएर उनको परिवारले साँफे मार्तडी राजमार्ग विहानैदेखि अवरुद्ध गरेका छन् ।

घाइते भएकि विश्नाको गर्भमा ७ महिनाको बच्चा रहेको जिल्ला अस्पताल बाजुराका निमित्त सुपरिटेन्डेन शुनिल शाहले बताएका छन् । उनका अनुसार गर्भवति महिलाको थप उपचारका लागि सुर्खेत रिफर गरिएको छ ।

प्रहरीले बस चालक ४० वर्षीय उपेन्द्र मडै र बसलाई नियन्त्रणमा लिएर थप अनुसन्धान गरिरहेको प्रहरी नायव उपरिक्षक गिरीको भनाई रहेको छ ।