नागरिक रैबार/बाजुरा २६ कार्तिक। बाजुराका एक किसोर बेपत्ता भएको २ महिनापछि परिवारको सम्पर्कमा आएका छन् । गएको भदौ २२ गते कन्चनपुरको महेन्द्रनगरबाट बेपत्ता भएका बाजुराको बुढीगंगा नगरपालिका–१० बदेडाका १५ वर्षिया निर्मल विक २ महिनापछि परिवारको सम्पर्कमा आएका हुन् ।

अध्ययनको सिलसिलामा विगत ९ वर्षदेखि महेन्द्रनगरमा बस्दै आएका निर्मल २ महिना अघि आफ्नै कोठाबाट भागेर बेपत्ता भएका थिए । महेन्द्रनगरको साधारण माविमा कक्षा १० मा अध्ययनरत रहेका निर्मललाई २ महिनासम्म खोजी गरेपछि भारतको हरियाणा भन्ने ठाउँबाट कार्तिक २२ गते सम्पर्कमा आएको र केही दिनभित्र घरमा आईपुग्ने उनका दाई राकेश विकले जानकारी दिएका छन् ।

२ महिनादेखि बेपत्ता भएका निर्मलको छिमेकी देश भारतमा रहेका आफन्तहरु र जिल्ला प्रहरी कार्यालय कन्चनपुरमा खोजि कार्यका लागि खबर गरिएको थियो । भदौ २२ गते वेपत्ता भएका निर्मलले एउटा कागजमा अंग्रेजी भाषामा उल्लेख गर्दै कोठामा मलाई नखोज्नु होला, म ठुलो र राम्रो मान्छे बनेर मात्र फर्केर आउँछु भनेर लेखेको चिठी कोठामा छाडेको पाईएको थियो ।

विज्ञापन