नागरिक रैबार/बाजुरा १६ जेठ। बडीमालिका नगरपालिका वडा नं. ८ स्थित रापकमा रहेको मष्टेश्वरी आधारभुत विद्यालयको २ कोठे भवनको सिलान्या गरिएको छ ।

आईतबार बडीमालिका नगरपालिकाका नगरप्रमुख अमर बहादुर खड्काले एक औपचारिक कार्यक्रमकाविच उक्त भवनको सिलान्यास गरेका हुन् ।

बडीमालिका नगरपालिकाको समन्वय र राष्ट्रपति शैक्षिक शुधार कार्यक्रम अन्तरगतको १८ लाखको लागतमा २ कोठाको सुविधासम्पन्न भवन निर्माण गर्न लागिएको विद्यालयका व्यवस्थापन समिति अध्यक्ष विरबहादुर थापाले बताएका छन् ।

विज्ञापन

विद्यालयमा यस अघि निर्माण भएका भवनहरु जिणर् र वर्षातको समयमा चुहिने र विद्यार्थीको पठनपाठनमा समस्या भएकोले २ कोठाको पक्की भवन निर्माण गर्न लागिएको विव्यस अध्यक्ष थापाले बताएका छन् ।

विद्यालय भवनको सिलान्यास गर्दै नगरप्रमुख खड्काले नगरभित्रको शैक्षिक क्षेत्रको गुणस्तर सुधारका लागि आफु निरन्तर लाग्ने बताएका छन् । साथै उनले नगरपालिका भरीका सवै सामुदायिक विद्यालयमा भौतिक संरचनाको अभाव हुन नदिने प्रतिवद्धता व्यक्त गरेका छन् ।

मष्टेश्वरी आधारभुत विद्यालयका विव्यस अध्यक्ष विरबहादुर थापाको अध्यक्षतामा गरिएको विद्यालयको भवनको सिलान्यास कार्यक्रममा प्रमुख अतिथि नगरप्रमुख अमर बहादुर खड्का रहेका थिए । कार्यक्रममा बडीमालिका नगरपालिकाकी उपप्रमुख नन्दा कुमारी थापा, २ का वडा अध्यक्ष डम्बर महत, ८ का वडा अध्यक्ष चन्द्रबहादुर थापा लगायत विद्यालय व्यवस्थापन समितिका पदाधिकारी शिक्षक अभिभावकहरुको सहभागिता रहेको थियो ।