नागरिक रैबार/बाजुरा २२ जेठ।बडीमालिका नगरपालिकाका नगरप्रमुख अमर बहादुर खड्का सदरमुकाम मार्तडी बजारको सरसफाई गर्न आफै मैदानमा खटिएका छन् ।
सदरमुकाम मार्तडी बजारलाई सफा र सुन्दर बनाउन नगरपालिकाको पहिलो बैठकले गरेको निणर्य अनुसार नगर प्रमुख खड्का आईतबार दिउसो सदरमुकाम मार्तडी बजारको सरसफाईमा खटिएका हुन् ।
नगरपालिकाले पहिलो चरणमा मार्तडी बजारलाई सफा र व्यवस्थित बनाउने निणर्य गरेको थियो । सोही निणर्यलाई कार्यान्वयन गर्न नगर प्रमुख खड्का बजारमा यत्रतत्र देखिएको फोहोरलाई संकलन गरेर व्यवस्थापन गर्न लागेका हुन् ।
विज्ञापन
विश्व वातावरण दिवसको अवसर पारेर बडीमालिका नगरपालिकाले सदरमुकाम मार्तडी बजारको फोहोर मैलालाई व्यवस्थापन गर्ने गरी सरसफाई कार्यक्रमको आज सुभारम्भ गरेको थियो ।
बाजुराको मुटुका रुपमा रहेको सदरमुकामको मार्तडी बजारलाई सफा र स्वच्छ बनाउने गरी बजारको सरसफाई व्यवस्थापन गर्ने कार्यपालिकाको निणर्य अनुसार विश्व वातावरण दिवसको अवसर पारेर सरसफाई कार्यक्रमको सुभारम्भ गरिएको नगरपालिकाका प्रवक्ता धर्मराज पाध्यायले बताएका छन् ।
बडीमालिकाको पहिलो बैठकले सदरमुकाम समेत रहेको मार्तडी बजारलाई सफा र सुन्दर बनाउन सरसफाई व्यवस्थापन कार्यदल बनाएर मार्तडी बजारमा आवश्यकता अनुसार मानवीय एंव भौतिक श्रोत साधानको प्रयोग गरि बजार क्षेत्रको पहिलो चरणको सरसफाई कार्यक्रम सुभारम्भ गर्ने निणर्य गरेको थियो ।
आज नगर कार्यपालिकाको पहिलो बैठकले गरेको निणर्य अनुसार सदरमुकाम मार्तडीमा नगरप्रमुख अमरबहादुर खड्का, प्रमुख जिल्ला अधिकारी प्रकाश चन्द अधिकारी, डिएसपी सुर्य थापा, वडा अध्यक्षहरु, नगरपालिकाका कर्मचारी, र सुरक्षाकर्मीहरुले बजारमा सरसफाई गरेका छन् ।
मार्तडी बजारको नियमित सरसफाईका लागि १० जना कामदारलाई रोजगार दिएर सरसफाई गरिने भएको छ । त्यसै गरी बडीमालिका नगरपालिकाबाट उत्सर्जन हुने फोहोर मैलाको दिगो व्यवस्थापन गर्न ल्याण्डफील्ड साईट निर्माणका लागि प्रारम्भिक अध्ययन समेत गरिने भएको छ ।
फेसबुक प्रतिक्रियाहरु