काठमाडौं। नेपाल कम्युनिस्ट पार्टी (माओवादी केन्द्र) का मुख्य सचेतक देव गुरुङले सरकार कर्णाली प्रदेशको दृश्य देखेर डराएको आरोप लगाएका छन्। सरकारले आज दिउँसो १ बजेदेखि प्रतिनिधिसभाको चालु अधिवेशनको अन्त्य गरेपछि प्रतिक्रिया दिँदै सचेतक गुरुङले दिनभरमा फेरिनसक्ने घटनाक्रमले ओली डराएको बताए।

यसैबीच, पार्टीको आज बस्ने भनिएको स्थायी समिति बैठक स्थगित भएको छ। आज बस्ने भनिएको बैठक सरकारले अधिवेशन अन्त्य गर्ने निर्णय गरेसँगै स्थगित भएको मुख्य सचेतक गुरुङले जानकारी दिए। अविश्वासको प्रस्ताव दलहरुको अधिकार भएको यसलाई कुण्ठित गर्न नहुने पनि बताए।

उनले भने, ‘बजेट अधिवेशन आह्वानका लागि पनि यो अधिवेशन अन्त्य गर्नुपर्ने हुन्छ। तर अविश्वासको प्रस्ताव आउँछ भन्ने भयले अधिवेशन अन्त्य गर्नु छै ठीक होईन।’ गुरुङले आवश्यक गृहकार्य गरेर बैठक भोलि बस्ने बताए।

समसामयिक राजनीतिक विषयमा छलफल गर्न माओवादी केन्द्रले आजका लागि बैठक बोलाइएको थियो। पार्टीको आगामी योजना, सरकारलाई दिएको समर्थन फिर्ता र नयाँ सरकार गठनबारे बैठकमा छलफल गर्ने बुझिएको थियो।