दैलेख, १ साउन । दैलेखमा कोरना संक्रमित भएका बिरामिहरुलाई उपचारका लागि निर्माण गरिएको आइसाेलेसन अस्पताल सञ्चालनमा आएको छ । सदरमुकामको उत्तरतर्फ तर्ताङ्गमा रहेको सरस्वती मन्दिरको डाँडामा कोराेना संक्रमित बिरामीका लागि बनाइएको ५० शैयाको अस्पताल बुधबारबाट सञ्चालनमा आएको हो ।

कर्णाली प्रदेशका सांसद अमरबहादुर थापाको निर्वाचन क्षेत्र पुर्वाधार विकास कोषको ७१ लाख रकमबाट सो अस्पताल निर्माण गरिएको हो ।
जिल्लामा कोराेना संक्रमणको दर उच्च रहेको बेला सामुदायिक विद्यालयमा अस्थायी रुपमा आइसाेलेसन बनाएर उपचार भैरहेको थियो भने कतिपय क्वारेन्टाइनहरुलाई नै आईसाेलेशनको रुपमा प्रयोग गरी उपचार गरिएको थियो । अहिले विदेशबाट आउनेको संख्या कम भएकाले ५० जति मात्रै बिरामी आईसाेलेसनमा  छन्। क्वारेन्टाईनमा २०० जति मात्र बसिरहेकाे अस्पतालका डा. निरन्जन पन्तले बताउनुभयो ।

सुविधा सम्पन्न सो अस्पताल सञ्चालनमा आएपछि कोराेना पोजेटिभका साथै उपचारमा खटिएका स्वास्थ्यकर्मीलाई पनि सहज हुने बताइएको छ । तत्काल बनाउनुपर्ने भएकोले सबै पक्षसँग सल्लाह गरेर सबैले सयोग गरेपछि करिब ७० लाखमा सांसदको क्षेत्र विकास कोषबाट भुक्तानी गर्नेगरी काम सम्पन्न भएको कर्णाली प्रदेश सभाका माननीय अमर बहादुर थापाले बताउनुभयाे । तत्काल निर्माण गर्न नपाईने भएकोले आउँदो आर्थिक वर्षमा भुक्तानी दिने शर्तमा निर्माण कार्य जिम्मा दिइएको सांसद थापाले बताउनुभयो ।

विज्ञापन

कोरना संक्रमितको संख्या बढिरहेको बेला तत्काल बनाउनु पर्ने भएपछि प्रिफ्याब प्रबिधि बाट २१ दिनमा सो अस्पताल निर्माण गरी सञ्चालनमा ल्याइएको हो । प्रिफ्याब प्रविधिबाट ५० शैयाका ५ वटा भवन निर्माण गरिएको जिल्ला स्वास्थ्य कार्यालय दैलेखले जनाएको छ ।

दैलेखमा हालसम्म ८४३ जनामा कोराेना पोजेटिभ पाइएको छ । तीमध्ये उपचारपछि ७२५ जना निको भएर घर फर्किएका छन् । जिल्लामै पिसिआर जाँच गर्न ल्याब सञ्चालन गरिएकोले रिपाेर्ट छिटो आउनुका साथै उपचारमा पनि सहज भएको छ ।