काठमाडौं – नेपाल कम्युनिस्ट पार्टी (नेकपा)को स्थायी कमिटी बैठक बालुवाटारमा सुरु भएको छ ।

आन्तरिक विवादका कारण झण्डै डेढ महिना अघि स्थगित बैठक विवाद समाधानउन्मुख भएपछि शुक्रबार बसेको हो ।

बैठकमा अध्यक्षद्वय केपी ओली र पुष्पकमल दाहाल प्रचण्डले तयार पारेको पार्टी र सरकार सञ्चालनसम्बन्धि १५ बुँदे प्रस्तावमाथि सामान्य छलफल गरेर पारित गर्ने तयारी छ ।

विज्ञापन

गत असार १० गतेबाट सुरु भएको बैठकमा प्रधानमन्त्री केपी शर्मा ओलीको राजीनामाको विषय चर्किएपछि साउन १३ पछि अनिश्चितकालका लागि स्थगित भएको थियो ।

यो विचमा पार्टी नै फुटाउने तहसम्म पुगेका नेताहरुबीच पटक पटकको सम्वाद र विवाद समाधान गर्न कार्यदल गठन गरेर विवादलाई समाधानतर्फ लगेपछि बैठक पुन बस्ने बातावरण बनेको हो ।

गत साउन ३० गते महासचिव विष्णु पौडेलको नेतृत्वमा गठन भएको ६ सदस्यीय कार्यदलले दिएको प्रतिवेदनका आधारमा अध्यक्ष ओली र प्रचण्डले बैठकका एजेण्डा तयार गरेका छन् । कार्यदललाई नै आधार बनाएर तयार एजेण्डामा दुई अध्यक्षको जिम्मेवारीबारे प्रस्ट पार्नेदेखि चैतमा महाधिवेसन गर्ने, निश्चित मापदण्डका आधारमा मन्त्रि तथा राजनीतिक नियुक्ति गर्ने, पार्टी एकताका बाँकी काम असोज महिनामा सक्ने,लगायतका विषय समेटिएका छन् ।

कोभिड १९, एमसीसी, लगायतका विषय समेटिएको अध्यक्षद्धयको प्रतिवेदन पारित गर्ने र बैठक स्थगित गर्ने तयारी भइरहेको नेताहरुले बताएका छन् । तर कार्यदल हुदै अध्यक्षले अन्तिम रुप दिएको प्रस्तावमा बरिष्ठ नेता माधवकुमार नेपाल सन्तुष्ट हुन सकेका छैनन ।

उनले पार्टी एकतादेखि नै उठाउदै आएको एक व्यक्ति एक जिम्मेवारीको कुरा कार्यदल र अध्यक्षको प्रस्तावमा नपरेपछि नेता नेपालले खुलेर विरोध गर्न पनि सकेका छैनन भने पुर्ण समर्थन गर्न पनि हिच्किचाएका छन् ।

आजको बैठकमा नेता नेपालको प्रस्तुती कस्तो रहन्छ भन्नेमा नेकपाका नेताहरुले चासोका साथ लिएका छन् । किनभने ओलीको राजीनामा माग्दा प्रचण्ड र नेपाल एकातिर भएपनि अहिले ओली प्रचण्ड एकातिर र नेता नेपाल अर्कोतिर पुगिसकेका छन् ।