उदयपुर, २७ असोज। उदयपुरबाट आठ जना जुवाडे पक्राउ परेका छन्। नेपाली कांग्रेस उदयपुरका एक जना नेताको घरबाट करिव दुई लाख नगदसहित आठजना जुवाडे पक्राउ परेका हुन्।

घरमै जुवा खेल्दै खेलाउँदै गरेको अवस्थामा आइतबार राति उनीहरु पक्राउ परेको जिल्ला प्रहरी कार्यालय उदयपुरका सूचना अधिकारी डिएसपी हरिकृष्ण केसी जानकारी दिए। त्रियुगा नगरपालिका ११ स्थित घरमा जुवा खेलाइरहेको सूचनाको आधारमा घरमुली वसन्तन बस्नेतसहित आठजना पक्राउ परेका हुन्।

पक्राउ परेका आठ जनामध्ये वसन्त बस्नेत र सुमन्त कोइराला नेपाली कांग्रेसका जिल्ला नेता रहेको खुलेको छ,’ उनले भने, ‘कुन तहको नेता भन्ने जानकारी छैन, तर, उहाँ कांग्रेसको क्षेत्रीय सभापति भएको जानकारी पाइएको छ।’ जिल्ला प्रहरी प्रमूख एसपी वीरबहादुर बुढामगरका अनुसार बस्नेत आफ्नो घरमा तास खेलिरहेको अवस्थामा अन्यसहित पक्राउ परेका हुन्।

विज्ञापन

‘नगद एकलाख ८० हजाुर ७२० रुपैयाँ र तास ३ बुक बरामद भएको छ,’ उनले भने, ‘तास पनि जुवा जस्तै भएकाले पक्राउ गरिएको हो, उनीहरु जुवाडे नै हुन्।’ उनका अनुसार पक्राउ पर्नेमा त्रियुगा नगरपालिका १० का ४२ वर्षीय दुर्गा श्रेष्ठ, ४० वर्षीया किरण पाण्डे, त्रियुगा नगरपालिका ११ का ४४ वर्षीय सुमन्त कोइराला, ५० वर्षीय वसन्त बस्नेत, ३५ वर्षीय भविन्द्र खत्री, ३५ वर्षीय यलराम कार्की, ४७ वर्षीय बालकृष्ण कार्की र त्रियुगा नगरपालिका ११ कै ४० वर्षीय राजु राउत रहेका छन्।

पक्राउ परेका बस्नेत २०७४ सालमा भएको स्थानीय तहको निर्वाचनमा त्रियुगा नगरपालिकामा नेपाली कांग्रेसका तर्फबाट पराजित उम्मेवार हुन्। कोइराला त्रियुगा नगरपालिका ११ नम्बरमा नेपाली कांग्रेसकै पराजित वडा अध्यक्ष हुन्। लोकपाटीबाट